Xuxpë pättsoop

Yäm Ëxkatsp ja xëëw jyaak yëk pääty jyaak yëk ijxy, miti'ipë, matëkëë tso'ontäkp, ku ja xuxpë ojts 'yats yëk pättsowtë, 'yats yëk wejts tsowtë, në mëj në may, ja uu'nk ja unä'jk.
Nëtekëëk ja xuxpë ojts myentë jyä'ättë, myë jawyeen ja Mëj yuk ämët ja xyuxpë ojts yëk way yëk witsy; jam ja kutunktëjktë, mëët ja majää'tyëjk ojts ja käjpxpoo'kxën t'ajts pëktä'äktë, mëët ja tsyeen ja pyijy, nëtu'uk nëtu'uk.
Ja mëj kutunk yä'ätpë jya tyimy ja nëkupäjk ajtypy. Nukë te'pxëmpity te'px atijy, jya tyimy ja kujwëtity, jya naxy jya tëkë.
Namay ja jää'y ojts ttayë'ëmyuktte, jam ja kë'ëm kukäjptë, jats nayëte'en miti'pë wenk käjkp tsoo'ntëp, ja ëxpëjkpëtëjktë, ja tëë'xy ja yää'y. Jam ja nmëku'uktë, pën ojts ttamëtsokte ja xuxpë, ja wyet ja nyäämy, ja'ats jyäämyajtspajt ättëp.
Ojts tu'uk majtsk ja xujxën tpëktä'äktë, ja'ats ja jää'y nëxëm nëyäm ojts tnëwä'kwëtette, paa'xëmpity paa'x atijy, tuk nëë' tuk tuu, nukë ja teky nyapamää'kx awëtityë.
Jantsy ëy jantsy tsyuj, jya kaxi'iky ku jate'en ja jää'y xyontä'ktë nëmëj nëmay, nya tyejwëtityëyëtë, tkayëknëpäätëtë ja etsy. Jam ja' pën ajtstëp tuk tëë'xyëjk, jam ja' pën tuk yää'tyëjk, jamts ja'të pën ja të'xy mëëy ja yää'y nyawyets etsyëyëtë. Ka pën tyimy ëxnij'ikyxy, ja mëjy ja mujtskëte'en jam wä'kwëtejttëp.
Ku ojts jam 'yapäätë, myëtukpiky, yënetts ojts nyëjkxtë jap tsajptëjk jëtsp, mä ja kunuukxën ojts t'ajtspäättë t'ajts ejxtë. Japts ja tsyeen ja pyijy ojts t'ajts kuno'oktë. Tum poop tseen jëts nayë poop pijy ojts tyooxtë, jats ja käjpxäjkën yiin waan t'ats käjpxtë t'ats ëëwtë, wënë'nën jap ojts 'yats nyamyukyëyëtë jap tsajpjëën jëtypy, tsajptëjkjëtypy.
Ojts jyaak tuu'yë'ëy ja xuxpë pättsääjën, ja Nepa'ämët xuxpë ojts jyawyeenëtë, jats ja Texykyë'emët, ojts tsim ojk. Jeky ja ojts yëk awejxtë, kootsnëm ojts jyä'ättë, jeky ja jää'y ojts 'yawejxtë, muum ojts tsyoo'nëtë, ku jeky ämp jya awejxtë, jams ja' pën ka wyantejtep, jam muum nyaku'uxäkyetë.
Ojts ja ajtsën jyaak yëk pääty jyaaky yëk ijxy, jats ja xuxpë ojts jyaak 'yats yëk kunuu'kxtë, jëts ojts nyëjkxnëtë a'uxëpë.